قصيدة (( جـــــــــرح نخلــــــــــه))

.....
ودت عينهه امك هاي الك وياي
وكبل عيونهه الچرغد موديته

تگلك هسه ترجع بعد مابياش
خبطني افراگكم والدمع صفيته

وظل مگوار ابوك بلايه زلمه شلون
الك ضما گبل وبروحي ضميته

وتگلك مهر ابوك يدگ حوافر غيض
وانه بشيلتي من گطع شديته

وعليه تراب ظل من ثورة العشرين
افه وانت ابن ابوك شلون خليته

ورسمت جرح نخله بطول گاع الموت
ماكلهه الملح بس هيه حاميته

على دربك تخط يوميه تعود
طاويهه الدمع والدرب طاويته

البيت الينهجم يعني اهله عنه بعيد
درجع لاعراقك ينهجم بيته

عجيبه شلون صابر عن حظن بغداد
ذيچ المسح بيهه الورد ناصيته

عجیبه شلون عديت الليالي السود
لا. خط الحدود شلون عديته

چنت فوگ السگف والعلم بيدك چان
هديت العلم والسگف هديته

شايف من تطيح بگاعك شمحلاك
يتلگاك ابوك بطرف خاچيته

ويزرعك بگاعه تخضر شچم شاب
چاغير الوطن ترجعله عافيته

عراقية الوطن رحت وخذتهه وياك
بس ترد أله ترجع عراقيته

دموعك صخر واحنه گلوبنه من تراب
وگلب الوالده والوطن فتيته

ماتقبل علمنه يشيله ياهو الچان
حط ايدك بدي ونشيل ساريته

ترى جندي الوطن بس حاني راسه الشوگ
ماتقبل وطنه اطيح بيريته

عليك الهجم خيبر من هجم عالجيش
ترجع لاعراقك ينهجم بيته
ترجع لاعراقك ينهجم بيته

____
ميثاق الهلالي

موضوع: رد السبت فبراير 02, 2008 12:55 pm

المبدع الهلالي
كنت ولازلت شاعرا مبدعا لك مني كل الاحترام
لمساهماتك الثرّة

تتحياتي

» قصيدة ميسان
» قصيدة((عـــــــــرس بغــــــــــــداد))
» قصيدة _شمـــــــــــس وكـمـــــــــــــر
» قصيدة (((لاتخجل بعد )))
» قصيدة (((آخــــــــر قصيـــــــــده)))