عطش رمضان

مر ماينجرع طعمك بالحلوك
ورغم علكم طعم حبك جرعته
وشفت هواي منك يامه زلات
اشوفك بس اكولاً يمته شفته
ويلوموني ناسي شبيك ذليت
بعلو صوتي اجاوبهم عشكته
ولون مريت تذكر لمن مريت
الدمع بتراب البهدمك عجنته
رحت لمن رحت وشصار بالروح
طفل ويريدكم جيب اليسكته
تعال لخاطر الله وخل يجي النوم
صدك جفني بعدك ما طبكته
احن لشوفتك وابجيك بسكوت
ويكتلني البجي لو صار سكته
ياعطاب مرني وجوي الجروح
بلكي بجويتك تشفيلي علته
ودوس بوسط كلبي لون عديت
موكد بالكلب بلجن تخفته
وامل الكلب لو مر بيه طاريك
وامل شوفك ولا لحظه كطعته
وودعتك وداع الام للوحيد
تامل الناس من يرجع بزفته
....
ودعتك وداع الام لبنهه
ودر وي دمعي تعب امي ولبنهه
هدم روحي الوكت طشر لبنهه
بوداعك وانته ماحسيت بيه
.....
شتامل تجي ياعطش رمضان
ماي وكفر لو بلساني ضكته
جنت مو ملك واحد ما احاجيك
وخاف الساني يحجيلك عكدته
هسه شلون يالرايح للاغراب
موحقي الحجي ومو ملكي انته
رايح وين رايح اصبر ارجوك
بعد موضوع واحد ماذكرته
راح انطيك حاجه وانه مسؤل
واضل ممنون منك لون صنته
هاك اخذ الكلب والعين والروح
واخذ كلي لان كلي ملكته
واخذ
كلي
لان
كلي
ملكته.






محمود العاطفي /كربلاء
mahmood88m@yahoo.com